Ticker

6/recent/ticker-posts

Cambly | كامبلي ، تجربتي الشخصية




السلام عليكم ورحمة الله وبركاته

مرحبًا أصدقائي

سبق وتكلمت عن تجربتي بشكل عام لكامبلي في تويتر هنا
ولما جتني اسئلة كثيرة حصرتهم وجاوبت عليهم بالتفصيل
و حبيت أرجع أجمعها بتدوينة وحدة مفصلة أكثر كمرجع

_____________________

ما هو كامبلي؟

يعطي لك كامبلي امكانية الوصول الفوري إلى الناطقين باللغة الإنجليزية، لذلك يمكنك التدريب على المحادثة باللغة الإنجليزية 24/7 كلما كان لديك الوقت للتدريب. يمكنك تصفح ملفات تعريف المعلمين ﻹيجاد معلم ذي خبرة باهتماماتك. يمكنك الوصول إلى كامبلي من هاتفك المحمول، أو من جهاز كمبيوتر مع كاميرا ويب (إن أردت ذلك).

ما هي مميزات كامبلي؟

* معلمين لغتهم الأم الإنجليزية (من دول مختلفة)
* أسعار رمزية و معقولة مقارنة بالمعاهد
* تعلم من المنزل وفي أي وقت
* تسجيل الجلسات مع المعلم ومراجعتها بأي وقت
* توفر مناهج ومصادر تعلم منوعة في الموقع
* تحديد جدولك بنفسك بدون الإلتزام بطلاب آخرين
* توفر شهادة بعد إكمال 50 ساعة دراسية

____________________

* لأي درجة كانت استفادتك من كامبلي؟

لاحظت التطور من بعد أول أسبوعين زادت ثقتي بالكلام و صرت أخذ و أعطي أكثر مع المعلمين.
بعد أول شهر لاحظت الفرق بالجمل اللي تطلع معي و قلّ عندي التوقف المفاجئ بسبب كلمه ناسيتها
وصرت استبدلها بكلمات بسيطه و يعطوني لها مرادف فوكاب وبكذا صار عندي حصيلة فوكابز كويسه.
بعد شهرين صرت أنا اللي افتح مواضيع معاهم و يسمعون لي أكثر مما اسمع لهم
و بديت أبدل بين المعلمين عشان اكسب اكسنت مختلف و استوعبه اكثر
و برضو صرت احدد لنفسي جدول (قراءة مقال ويعدلون لي النطق / محادثة عامه / درس فوكاب / تدريب مقابله).
في اخر الشهر الثالث لاحظت تطور كبير مره صرت احكي بشكل أسرع و أوضح
و المعلمين الجدد يثنون على لغتي بالاضافة اني دخلت مقابلة وظيفة وكانت بالانقلش
الحمدلله ثقتي كانت مرتفعة و استفدت من دروس المقابلات اللي اخذتها.
في الشهر الرابع ما مشيت على جدول ركزت بس على السبيكنق صرت أحكي لهم عن يومي أو الأشياء اللي أحبها
في الشهر الخامس رجعت التزم بجدول وأركز على القراءة من السبيكنق و الآكسنت.
في الشهر السادس ما سويت لي جدول لكن مازلت مركزة على النطق و الآكسنت، وكل مره أجرب معلم جديد واختار درس أو مقاله عشوائية معهم.
في الشهر السابع والثامن ما التزمت بجدول معين، كنت اتصل فقط على معلميني المفضلين (صديقاتي) وأسولف معهم عن يومي بالشهر هذا مالاحظت تطور قوي لكن كان كلامي سلس ولا ينقطع وبالمكالمة الوحدة أنسى كلمتين أو ثلاثه بس لكن على طول أذكر كلمات مشابهه لها وهم يساعدوني بالكلمة الأساسية اللي أبي أقولها
في الشهر التاسع بديت أركز على التجهيز للآيلتس ، اسأل عن تكنيكات للحل ونصائح للاستعداد و حسب مزاجي يومها يا أما فقط محادثة عامة عن يومي مع معلمتي المفضلة أو براكتس للقراءة و بديت آخذ كلاسات للرايتنق بأني أكتب ثم أرسل للمعلمة كتابتي ووقت المكالمة تصححها معاي و تعطيني بدائل أو تعلمني نقاط الضعف عندي ثم تعطيني اكتب عن موضوع للكلاس القادم.
في الشهر العاشر قررت أخذ اختبار الآيلتس وبديت أتدرب بشكل جدي مع مجموعة من المعلمين وكل مره أركز على قسم بس أكثر شي حطيت فيه حيلي وجهدي كان قسم القراءة والمحادثة، كل مره أخذ موضوع جديد وأتدرب عليه قبل لا اتصل بالمعلمة ثم لما اتصل تسألني وأجاوب بدون وقت محدد وكانوا يساعدوني بتصحيح الإجابات وقتها ويعطوني بدائل أفضل لإجاباتي .. لتفاصيل أكثر [من هنا تجربتي في اختبار الآيلتس]
في الشهر الحادي عشر قبل الاختبار كان تدريب مكثف على قسم المحادثة بس هالمرة اتصل ويتعاملون معي بجدية أطلب منهم بداية المكالمة إنه يكون كأنه اختبار حقيقي فيفتحون ملف التقييم لاختبار الايلتس ويسألوني ويكون عندي مؤقت وهالشيء ساعدني كثير بأني أعرف متى أتكلم ومتى أوقف وهل سرعتي مناسبة أو لا والحمدلله أخذت ٧.٥ في قسم المحادثة.
في الشهر الثاني عشر كان دخولي متذبذب، ومجرد محادثة وسوالف مع نفس المجموعة اللي تعودت عليها وبعدها توقفت عن استخدام كامبلي تقريبًا شهرين إلى ثلاث شهور.


ككل كيف كنت وأيش صرت؟
بعد سنه ونصف من استخدام كامبلي، صرت أقدر أتكلم خصوصًا مع الأجانب بطلاقة وكلمات واضحة .. قدرت أعدي ٣ مقابلات كلها من أولها لآخرها بالأنقلش .. صرت أقدر أخذ كورسات مقدمينها ومحتواها باللغة الانجليزية .. مستواي بكل المهارات تحسن وتواصلي المباشر مع المعلمين من أهم الأسباب اللي خلتني أتشجع أبحث أكثر وأحس برغبة أني أتعلم، ولما أبدا بمحادثة جديدة مع أي معلم على طول يثنون على لغتي.
مازلت غير راضية عن مستواي وأبي أتطور أكثر ومازلت استخدم كامبلي وتطبيقات أخرى تساعدني على التطور بدون ما أحس بأنه شيء إلزامي علي مثل تطبيق قرامرلي [هنا ذكرت تجربتي للتطبيق] وساعدني جدًا بالكتابة .. أيضًا مازلت أواجه صعوبة شوي بالتحدث باللغة عند الأشخاص العربيين ليه ما أعرف لكني أعمل على حل هالشيء بأني أتكلم مع اللي حواليني فيها لأن ربما تكون مشكلة أني ماتعودت فقط.

تحديث: تطور اللغة يتطلب استمرارية وأهم مفتاح هو الممارسة ثم الممارسة ثم الممااااارسة، في فترة بسيطة وقفت استخدام للغة في يومي وفقط اكتب او اقرأ او استمع لكن ما اتحدث وقل المستوى شوي.. فعرفت أني احتاج من جديد أطور المحادثة عندي فرجعت استخدمها عن طريق كامبلي، أول جلستين كانت صعبة بعدها رجعت انطلق من جديد الحمدلله ومازلت استمر بممارسة اللغة سواء بأني أتكلم مع نفسي فيها أو ادخلها بجملي او استخدمها في العمل وغيره، اللي ساعدني برضو اني الآن في بيئة اجنبية فاستخدام اللغة إجباري وكل شي باللغة الإنجليزية هالشي حسن عندي الاستماع برضو وفهم اللهجات المختلفة قد ما أقدر.
احتجت اختبر الايلتس من أول وجديد، فطمحت هذي المره تكون درجتي أعلى من المره السابقه لأن اخر اختبار كان من سنتين فالمفترض تكون درجتي أفضل .. قبل الاختبار سويت كم براكتس مع معلمين كامبلي لقسم السبيكنق حتى أحس اني في اختبار حقيقي و الحمدلله التوتر كان أقل لأني أعرف ان لغتي صارت أفضل من المره الماضية
وأخذت في قسم السبيكنق في الايلتس ٨! انصدمت من الدرجة بس أعطتني شعور جميل الحمدلله بإن التطور سهل ويحتاج فقط التزام واصرار
مازلت اشتغل على لغتي ومازلت أحتاج يكون تكوين الجمل عندي أسرع وبروفشنال أكثر وبرضو أحتاج اشتغل على الاكسنت أكثر
بس حبيت أشارككم تحديث جديد بما إن التدوينة الحمدلله مازال فيه عدد كبير يستفيد منها، وهالشي جدًا يبسطني

* كم كانت مدة اشتراكك؟

باقة ٣ شهور يوميًا كلاس ربع ساعة
بعدها اشتراك شهر ٥ ايام بالأسبوع ربع ساعة 
وبعدها اشتراك لمدة سنة 5 أيام بالأسبوع نصف ساعة
في الأخير حسب حاجتي يكون الاشتراك

* كيف اشتركتي؟

كان اشتراكي عن طريق التحويل البنكي بأول ٤ شهور لكنهم حاليًا قفلوه، والاشتراك بفيزا أو ماستر كارد. الأشهر تتجدد تلقائيًا بعد ماتنتهي بنفس السعر إلا لو قفلتوا الخيار من إعدادات حسابكم. والآن متوفر عندهم خيار الدفع بالتقسيط للباقات السنوية وأشوف انها فرصة جميلة جدًا

 * ليه اخترتي برايڤت؟

اخترت فردي عشان يكون تركيز المعلمين علي ١٠٠٪ وعشان ما استحي أتكلم بالبداية لان كانت عندي مشكلة بالسبيكنق. والآن الجلسات الجماعية غير موجودة.

* كيف استخدم التطبيق؟

‏بالنسبة للتطبيق سهل جدا بالتعامل (التطبيق للآيفون | التطبيق للأندرويد) .. وممكن عن طريق اللاب توب بعد.
وفيه ميزة ان الدرس ينحفط عندك فيديو ترجع له بعدين متى ما احتجته وكم مره رجعت لدروس قديمة استرجعها.
والمحادثات وقت المكالمة تنحفظ عندكم فلو المعلمة أرسلت تصحيح أو معلومة أو رابط تقدرون ترجعون له بأي وقت.

* أقدر أجربه مجانًا قبل اشترك معهم؟

ايوه أول ما تسجلون فيه لكم دقائق مجانية للتجربة
ولو حابين تحصلون على 15 دقيقة سجلوا من الرابط حقي (من هنا)
أو استخدموا الكود هذا ibasoom
بهالطريقة menu > referral code | القائمة > كود الإحالة
المهم تكونون ماقد استخدمتوا كود من قبله :



* الدقائق تبقى لي حتى لو انتهى اليوم ما استخدمتها؟

لا .. تروح عليك اذا كانت باقه وهذي ميزة ان الاشتراك يلزمك تأخذ كلاسك اول بأول والا تروح الدقائق وصدق شجعتني التزم فيه يوميًا و يعطيني شعور اني انجزت شي بيومي.
والدقائق تعتمد على نوع باقتك مثلًا لما أخذت اشتراك 5 أيام بالأسبوع كان عندي يومين إجازة بالأسبوع وأنا اختارها بكيفي.

* لازم أفتح الكاميرا؟

لا ، فيه خيار وقت الاتصال تقفل الكاميرا فيه وتكون مكالمة صوتيه بس تشوف المعلم بدون ما يشوفك.
بالإضافة لأن المكالمة لك لحالك ما يطلع عليها المعلم بعد ما تنتهي.. يعني سياسة الخصوصية موجودة.
و ممكن تحفظ الجلسة في جهازك تحمل الفيديو أو حتى تحذف الفيديو من حسابك عن طريق الموقع من المتصفح.

* أقدر أختار معلمين على كيفي وكيف أحجز موعد؟

ايوه اذا موجودين اون لاين او ممكن تأخذ معهم موعد او حتى تتفقون من قبل بالمسج على وقت محدد.
طريقة الحجز بسيطة:
من قائمة المعلم تختار المعلم أو تبحث عن اسمه > اختيار الموعد المناسب من الجدول بصفحته > تحدد عدد الدقائق اللي بباقتك > تختار الوقت بالضبط متى يبدأ الكلاس > تأكيد الحجز يوصلك على الإيميل ، وخلصنا.
طبعًا إذا بتكنسل الحجز لازم قبل بست ساعات وإلا تروح الدقائق حقتك .. أما لو كنسل المعلم الحجز دقائقك تبقى لك ما تضيع
و الشيء المهم إنه ما تتأخر عن الكلاس ربع أو عشر دقايق لان يروح عليك كلاسك وبكذا تروح دقائقك
وهذا من حق المعلم طبعًا لأنك حجزته عن طالب آخر. وبالنسبة للوقت يطلع عندك الوقت بدولتك وتحجز على أساسه.

الحجز جدًا مهم لأنك تضمن المعلم يكون موجود بوقتك، مثلًا لما حكيت هنا عن معلميني المفضلين ماشاء الله معد صرت ألحق عليهم 😂، وصرت اضطر احجز موعد معهم عشان أضمن يكونون متفرغين لي
وفي الايلتس مرررره مره مهم الحجز ساعدني انظم جدولي بيومي وأفرغ وقت للمذاكرة والتدريب

* كيف المعلمين و تعاملهم؟

المعلمين غالبيتهم متعاونين جدًا ويعطونك من قلبهم لين تفهم .. المهم إنك تبين لهم من أول المكالمة ايش هدفك و ايش تبي تتعلم و كيف طريقتك (صحح خطأي أول بأول / صحح خطأي نهاية المكالمة / لا تصحح لي)
ساعدوني في مقابلتي وفِي تعديل السي في حتى خارج وقت الكلاسات ..
و اختار المعلم المناسب لك ، بحساب كل معلم موجود ايش تعامله (صبور / لطيف / مرح ..الخ)
مروا علي معلمين سيئين لكن ما يتعدون ثلاثه و قيمتهم سيّء و السبب انه كانوا يضيعون الوقت او يخرجون عن موضوع الدرس. ومجرد ما يمر علي معلم نفس كذا أعتذر منه واقطع الاتصال وأدور معلم آخر مناسب لي حتى ماتضيع دقائقي معهم.

* هل ربع ساعة كانت كافية؟

‏مرات ينتهي الكلاس ما خلصت الدرس ، بس ميزته يكونون سريعين معاك ويعطونك زبدة المعلومة.
‏يعني اذا تحب انه تتعلم بوقت أوسع ماراح تكفي.
بالنسبة لي كبداية كانت كافية لأني خايفة من مسألة أني راح التزم يوميًا ‏فما كنت اشيل هم اني اخذ كلاس يوميًا اعرف بيخلص بسرعة
و لان كل يوم اخذ معلومات بسيطة تترسخ أكثر بالنسبة لي. المشكلة الوحيدة ما يكون فيه وقت براكتس لها.
لذلك الباقة حاليًا حقتي نص ساعة أعجبتني أكثر أنه صار فيه وقت أكتسب مفردات أكثر من انه مجرد ممارسة سبيكنق.
وحاليًا ماصارت تكفيني النص ساعة خاصة لو المكالمة كانت موضوع نقاش أو معلمة مفضلة صار لي وقت ما كلمتها.

* فيه دروس لازم تلتزم فيها ؟ ولا تكون المحادثة مفتوحة عن أي موضوع ؟

‏فيه دروس كثيره مجانية موجودة بالموقع حسب ايش تبي تتعلم (ايلتس/مقابله/اساسيات/كتابه...الخ)
(هنا المناهج الموجودة من كامبلي)
نصيحة مني لك جهز بنفسك ايش حاب تتعلم حسب الشي اللي تبي تطوره
سواء مواد من كامبلي او خارج كامبلي ، تقدر تتعلم كورس كامل تمشي فيه مع المعلم
او ممكن تأخذ الدروس اللي حاب تتعلمها من كل كورس.
وفيه انك بس تسولف معهم او لو بتسأل عن شي او حتى انك تجيب درس من نفسك و يعلمونك.

* نصيحة لو فيه نقطة بتركزون عليها او درس تتعلمونه:

‏انا بالعاده ارسله اول بالمسج للمعلمة و اقول اني راح استفسر عن كذا او حابه اتعلَّم عن كذا
و انه بأحكي معك بالموعد الفلاني او اخذ موعد من نفس البروفايل حقها عشان تكون مستعدة و تقرأه قبل ولا يضيع وقت المكالمه ع بحث وغيره.
‏الأهم من هذا كله تعرفون انه تعليم ذاتي مع تشجيع من المدرسين ، يعني ع قد ما انت مستعد نفسيًا انك تتعلم ع قد ما بتستفيد.
برضو احب اختار الدرس قبل أبدا المكالمة وانسخ الرابط وارسله لنفسي افتحه على ايباد أو اللاب توب و المكالمة تكون من التطبيق
عشان آخذ راحتي بقراءة الدرس و تصفح المواقع وما يكون صغير بالجوال وصعب قراءته.
حاليًا إذا كان هدفي من الجلسة تحدث اتصل من جوالي ولو كان هدفي تعلم اتصل من اللاب توب

* اي وقت مناسب؟

‏ عادي اي وقت خلال اليوم يناسبك تتصل ..
كل يوم الساعة ٣ الفجر يبدون يحسبون يوم جديد فيعني حطوا ببالكم متى تتجدد الدقائق يوميًا.
وممكن تختارون وقت مناسب لكم غيره تتجدد فيه الدقايق
و لازم النت كويس والا بيصير الفيديو يجيب الهم و ما تسمعك ولا تسمعها. 
فيعني احرصوا يكون وقت محد يستخدم الشبكة بالبيت غيركم. وابعدوا عن الساعة [١-٣ الليل]
دايم بعد ٤ الفجر يكون ممتاز ومعلمين متاحين كثير وبعد المغرب



* كيف أعرف مستواي قبل أبدا؟

‏ فيه اختبار سريع من موقعهم (هنا) أو ممكن تختبر في مواقع ثانية وتحدد مستواك.

افضل مدرس عربي أو انجليزي ؟

نصيحة مني أول كلاس خذي شخص يتكلم انقلش و شوفي نفسك بتقدرين تفهمين عليه و تحكين له او لا
لا تظلمين قدراتك يعني ، اذا صار مره صعب عليك .. الكلاس الثاني خذيه مع معلم عربي لين تتخطين البداية 
لان على قد ما تسوين براكتس مع أهل اللغة نفسهم على قد ما تتطورين اسرع بكثير 
لان تضطرين تحكين انقلش عشان يفهمونك ، تعرفين انه مافيه طريقة غيرها بيفهمون عليك.
و (من هنا) قائمة المعلمين اللي يتحدثون العربية.

* إذا عندي ظرف ولا راح أقدر أخذ الكلاسز فترة؟

فيه خاصية تجميد للحساب ، من أسبوع إلى ٣ أسابيع في حالة واجهتك ظروف تجمد مباشرة من إعدادات حسابك.

* فيه كلاسات خاصة بالآيلتس؟

ايوه .. فيه معلمين مخصوصين لهالشيء وتقدر تبحث عنهم من خانة المعلمين وبرضو فيه منهج خاص بالآيلتس

* متى آخذ منهم شهادة؟

لما تكمل الساعات التعليمية المطلوبة لدروس برايفت ، تحصل على شهادتك من موقع كامبلي و تطبعها لنفسك أو تحفظها عندك.

* معلمين تنصحينا فيهم :

فيه كثير الحقيقة ولا جربتهم كلهم.. لكن من خلال الوقت اللي فات قابلت ١١٧ من المعلمين وهذي القائمة اللي طلعت فيها
وما زلت كل فترة أجرب معلم جديد أشوف مناسب أسلوبه لي أو لا /
Speaking:
Joy A | Kerry M | Jade Palmer | Courtnie
Alejandra SMonique S | Sandra A | Tiara P

Vocabulary + Grammar:
Andi B | Jay L MAshley PerryEvelyn A | Becky CAmy Nicole
Shaila O | Teacher Alicia | Jessi J | Catherina A

 IELTS:
Ms. Freeman | Anna Cleg |

Alma B | Sheneca G

Writing :

Dave P | KathyJo T | Andy Educate | Vicky English |


Interview :
Orchid K | Ashley Perry  | Kerry M 


Children:

Ayman L | Rikro R |  Jay L M | Katarina Valdez

* مواقع تنصحينا نتعلم منها كمصادر خارجية :

- هذا الموقع فيه كمية مواضيع متنوعة وكل موضوع فيه مجموعة اسئلة ، أحب أختار موضوع وأناقشه مع المعلمة منها أكسب مفردات ومنها سبيكنق و تكوين جمل:

- موقع للمفردات :

- هذا الموقع للتعلم الذاتي فيه مجموعة مقالات مكتوبة مع مقطع صوتي لها
نصحتني فيه معلمة بأني اقراها بنفسي مره وأنا اسمع المقطع ، ثم اقراها بصوت عالي على نفسي

- ملف PDF فيه القواعد الأساسية :

- Phrasal Verbs :

- موقع فيه نماذج جاهزة ردود لإيميلات التقديم للوظيفة و المقابلات و ما بعد المقابلة


______________

موقع كامبلي : Cambly
تويتر كامبلي العربي : @cambly_ar
تويتر عناية العملاء : @Cambly_Care

______________

آخر تحديث تم بتاريخ: ٤ فبراير ٢٠٢١


أخيرًا إذا عندكم أي استفسار أو شغله ممكن أضيفها على التدوينة هذي
تقدرون تسألوني عن طريق تويتر
أو اكتبوا لي في التعليقات على نفس التدوينة


بالتوفيق جميعًا .. وبس والله.

إرسال تعليق

7 تعليقات

  1. حلو تشاركي الناس تجاربك , وايش استفدتي منها وكيف ..
    أنا المرة الكم اللي اقرأ تدوينتك ؟
    وأمر عليها آخد أسماء معلمين :) منجد مررة استفدت في دي النقطة
    لأنه لما تجربي تتكلمي مع أشخاص في كامبلي ي اللي ماتستفيدي منه
    أو مثلا يهرج معاك ومايصححلك أو العكس يصحح لك ويثني على الكلام اللي تقوليه و يشجع ..
    من أفضل الحاجات اللي عملتها إني اشتركت في كامبلي , استفدت منه بشكل جدا كبير ,, التنوع و الحرية اللي فيه حلوة ..
    الحرية بمعنى اللي تبي تتعلميه واللي تبغيهم يساعدوك فيه ..
    أغلب إذا ماكانوا كل المعلمين لطيفين ومتعاونين جدا جدا ,
    بس قولي ايش حابة تتعلمي وهما يحطوا يدهم في يدك ..
    يعني مثلا أنا اتدربت مع شخص على المقابلات الشخصية قبل فترة, ومع أشخاص حاليا باتكلم بالتركي وبطور من لغتي , غير بـ اتدرب على المحادثات لاختبار الايلتس و بهرج مع أشخاص محادثات انجلش عادية ..
    أفضضل شي صح كلامك أي وقت وفي أي مكان , دوبك صاحية أو بتاخدي بريك من الشغل مافش تقيد ..
    بسمة , ربنا يسعدك على المعلومات و التفاصيل
    و ييسرلك أمورك ويباركلك في وقتك وجهدك وشغلك ..

    ردحذف
  2. ممتاز مره شكرا على مشاركتك

    ردحذف
  3. مرحبا عزيزتي
    اولا حبيت ماشاء الله إصرارك على التعلم ، ثانيا عندي استفسار بخصوص كامبلي ، قرأت انه سعر الاشتراك غير عن سعر الدروس الموجوده هل هذا صحيح ؟ يعني ادفع للدروس الموجوده في الموقع غير سعر الاشتراك اللي انا دافعته .. هل ممكن تفيديني ؟ بأقرب وقت ممكن ❤️وشاكره لك

    ردحذف
  4. تدوينة أكثر من رائعة ومفصلة بشكل جميل ومحفز وأشرت في تدوينتي بخوص كامبلي إلى موضوعك لانه يستحق(:

    ردحذف
  5. الله يسعدك ويرفع قدرك علی التدوينة المتكاملة

    ردحذف
  6. الله يجزيك خير ويرفع قدرك ويزيدك من فضله جدا استفدت من تجربتك وبإذن الله راح اطبق كثير من النقاط اللي ذكرتيها ..اكرر شكري والله يوفقك.

    ردحذف
  7. صراحه حمستيني وشتركت فيه بس احس فيه صوبه انها مافي منهج و خطه واضحه تمشين فيها وكمان صعبه تفكين معهم موضيع واغلبهم المدرسين الي فيه مخذينها سوليف مو تدريس بصوره المتوقعه زي المعاهد انا من راي هو برنامج ينفع لناس الانقليزيتهم المتوسط وفوق وكمان ينفع للي حاب يمارس الغه يعني ينفع لو الواحد حاب يطور مهارت التحدث

    ردحذف

It's all about friendly conversation here ; I'd love to hear your thoughts and query ! Be sure to check back again because i do make every effort to reply to your comments here